Ospital d'Amours

Pa - Paris, Bibliothèque nationale, fr. 833

(1279 lines)

[fol. 162v d]

1
   1     Assez ioyeulx sans estre trop
   2     En la conduite de desir
   3     Le iour de lan souruint acop
   4     En lassemblee de plaisir   
   5     Ou ie veiz a mon beau loisir   
   6     Le tresor dhonneur desploier   
   7     Comme en vng passe de plaisir   
   8     En vng lieu a temps employer   

2
   9     Ce noble lieu estoit fourny   
   10    De tout fors de mal et de dueil   
   11    Lassemblement estoit vny   
   12    Chacun y sembloit a son vueil   
   13    Gy fuz plus lye que ne sueil   
   14    Car gy veiz dhonneur la montioye   
[fol. 163r a]   
   15    Qui est rabat de tout orgueil   
   16    Oncques mon viuant neuz tel ioye   

3
   17    Illec estoit le droit tresor   
   18    De dames et de damoiselles   
   19    Riens ny falloit debout encor   
   20    Tant estoit plain dhommes et delles   
   21    La veoit on dances nouuelles   
   22    Gracieuses sans eulx vanter   
   23    Et y ouoit on dieu scet quelles   
   24    La doulce noise deschanter   

4
   25    La fuz des dames bien vengie   
   26    Et comme se ie le voulsisse   
   27    Me requerant par amitie   
   28    Qune chancon dire voulsisse   
   29    De quoy voulentiers lescondisse   
   30    Sexcusance peut estre belle   
   31    Mais il conuint que iobeisse   
   32    Si en dis vne telle quelle